Komuna e Gjakovës ka siguruar një investim prej 1.5 milionë euro nga Projekti i Banimit Social Adekuat, i financuar nga Qeveria e Kosovës. Marrëveshja u nënshkrua mes ministres në detyrë të Mjedisit dhe Planifikimit Hapësinor, Fitore Pacolli, dhe nënkryetarit të komunës, Flamur Fetahaj. Nga kjo shumë, 1.35 milionë euro do të shfrytëzohen për ndërtimin e rreth 23 njësive të reja të banimit social, ndërsa 150 mijë euro do të përdoren për renovimin e gjashtë shtëpive private të familjeve në nevojë. Projekti ka për qëllim përmirësimin e kushteve të jetesës për familjet më të cenueshme, duke u ofruar atyre ambiente më të sigurta dhe dinjitoze. Ministrja Pacolli e ka përshkruar këtë investim si një mbështetje konkrete për ata që kanë nevojë më të madhe për ndihmë.