Gramos Hashani është zgjedhur Kryeshef Ekzekutiv i Korporatës Energjetike të Kosovës (KEK) nga Bordi i Drejtorëve, pas një procesi të hapur, transparent dhe konkurrues që përfshiu vlerësimin dhe intervistimin e kandidatëve me kriteret e përcaktuara në konkursin publik. Ai është diplomuar në Fakultetin Ekonomik të Universitetit të Prishtinës “Hasan Prishtina” dhe ka përfunduar studimet master në University of the Incarnate Word në SHBA. Hashani ka një eksperiencë të theksuar në menaxhimin strategjik financiar, qeverisjen korporative dhe investimet në tranzicionin energjetik, si në Kosovë ashtu edhe në Shtetet e Bashkuara, duke mbajtur pozita të larta në kompani ndërkombëtare dhe vendase. Bordi i KEK-ut shpreh besimin se nën drejtimin e tij, korporata do të përparojë në performancë dhe zhvillim strategjik.