Guvernatori i Bankës Qendrore të Kosovës, Ahmet Ismaili, së bashku me delegacionin e tij, u prit në Zyrën e Asistencës Teknike të Departamentit të Thesarit të SHBA-së gjatë Takimeve Pranverore 2026 të FMN-së dhe Bankës Botërore. Takimi riafirmoi partneritetin e fortë ndërmjet BQK-së dhe Thesarit amerikan, duke theksuar bashkëpunimin aktual dhe mundësitë për zgjerim në fusha strategjike si lufta kundër pastrimit të parave, financimit të terrorizmit dhe financimit të përhapjes, si dhe zhvillimi i infrastrukturës së tregut të kapitalit. Guvernatori shprehu mirënjohjen për mbështetjen e vazhdueshme të SHBA-së dhe vlerësoi rolin e tyre në ngritjen e kapaciteteve të BQK-së, ndërsa delegacioni informoi për avancimet ligjore dhe masat për forcimin e integritetit të sistemit financiar. Nga ana e tyre, drejtuesit e Thesarit konfirmuan gatishmërinë për të zgjeruar bashkëpunimin përmes një programi të ri asistence teknike dhe për të eksploruar projekte të reja për zhvillimin e tregut të kapitalit, duke mbështetur kështu misionin e BQK-së për një sektor financiar të fortë dhe të qëndrueshëm.