Kryetari i Partisë Demokratike të Kosovës dhe kandidati për Kryeministër, Bedri Hamza, ka prezantuar një paketë masash për sektorin privat, duke premtuar tatime më të ulëta dhe mbështetje financiare të zgjeruar. Ai theksoi se ekonomia e Kosovës bazohet në punën dhe investimet e ndërmarrësve, ndaj qeveria e tij do të ofrojë grante deri në 30% për sektorët prodhues dhe inovativë, si dhe do të zgjasë Fondin e Garantimit të Kredive. Bizneset me qarkullim vjetor deri në 10 mijë euro do të lirohen nga tatimi, ndërsa ato me qarkullim deri në 30 mijë euro do të tatohen vetëm mbi fitimin real. Një ndryshim i rëndësishëm do të jetë edhe mënyra e pagesës së TVSH-së, që do të bëhet në momentin e shitjes së produktit, duke përmirësuar likuiditetin dhe duke krijuar kushte më të favorshme për investime dhe punësim.