Zëvendëskryeministri i Parë dhe Ministri për Çështje Evropiane, Bekim Sali, theksoi në Forumin Ekonomik Maqedonia e Veriut – Turqia në Stamboll rëndësinë e forcimit të bashkëpunimit ekonomik ndërmjet dy vendeve dhe krijimin e partneriteteve të reja. Ai vlerësoi marrëdhëniet e shkëlqyera me Turqinë, një nga partnerët kryesorë ekonomikë, që investon në sektorë kyç si industria, infrastruktura, bankat, arsimi dhe turizmi, duke kontribuar në zhvillimin ekonomik dhe krijimin e vendeve të punës. Ministri Sali nënvizoi se integrimi evropian hap një kapitull të ri mundësish për ekonominë dhe bizneset, duke lidhur procesin me investime konkrete dhe integrim gradual në Tregun e Përbashkët Evropian. Ai ftoi kompanitë turke të shfrytëzojnë fondet dhe projektet infrastrukturore strategjike si Korridori VIII dhe X, duke theksuar gjithashtu potencialin në energjinë e ripërtëritshme, transformimin digjital dhe teknologjitë moderne për një ekonomi më konkurruese dhe të qëndrueshme.