Komuna e Prishtinës dhe Ministria e Mjedisit, Planifikimit Hapësinor dhe Infrastrukturës kanë planifikuar bashkëfinancimin e një projekti prej 10 milionë eurosh për ndërtimin e një ure mbi rrugën “A” në Veternik, e cila përfshin një mbikalim, nënkalim dhe lidhje rrugore. Projekti do të zhvillohet gradualisht deri në vitin 2029, me ndarje të fondeve për çdo vit nga të dy institucionet. Në kuadër të projektit parashikohet ndërtimi i një nyje shumëfunksionale me rrethrrotullim, rampa lidhëse dhe trotuare të pajisura me shirita taktilë për personat me dëmtime në shikim, duke synuar përmirësimin e rrjedhshmërisë dhe sigurisë së trafikut. Kjo ndërhyrje do të lehtësojë lidhjen e Veternikut me rrjetin kryesor rrugor dhe kompleksin spitalor, duke eliminuar konfliktet në aksin kryesor dhe duke rritur kapacitetin e rrjetit rrugor në këtë pjesë të Prishtinës.