Qeveria e Maqedonisë së Veriut ka njoftuar një investim të ri prej 21 milionë eurosh në Zonën e Lirë Ekonomike në Tetovë, të realizuar nga kompania multinacionale “Cavo Otomotive”. Kjo kompani me përvojë mbi 40 vjeçare në industrinë automobilistike planifikon të transferojë të gjithë prodhimin e saj nga Turqia dhe Sllovakia në Tetovë, duke e kthyer qytetin në një qendër të rëndësishme të prodhimit të kabllove kontrolluese dhe sistemeve të sigurisë për prodhuesit më të mëdhenj botërorë.