Ministrja në detyrë e Ekonomisë, Artane Rizvanolli, ka njoftuar një investim prej 775 mijë eurosh për përmirësimin e furnizimit me ujë të pijshëm në katër fshatra të zonës së Shalës në Komunën e Mitrovicës: Melenicë, Zjaq, Maxherë dhe Vllahi. Ky projekt realizohet në bashkëpunim me Komunën e Mitrovicës dhe Kompaninë Rajonale të Ujësjellësit Mitrovica dhe përfshin zgjerimin e rrjetit të ujësjellësit, ndërtimin e rezervuarëve dhe stacioneve të pompimit, si dhe shtrirjen e rrjetit në zonat me nevojë më të madhe për furnizim. Rizvanolli ka theksuar se investimi do të sjellë një shërbim më cilësor, menaxhim më të mirë të presionit dhe furnizim më të qëndrueshëm me ujë për banorët e këtyre fshatrave. Projekti pritet të përmirësojë ndjeshëm cilësinë dhe qëndrueshmërinë e furnizimit me ujë të pijshëm në këtë zonë.