Ministria e Ekonomisë dhe KRU "Prishtina" kanë nisur një investim të përbashkët mbi 2.2 milionë euro për të përmirësuar furnizimin me ujë të pijshëm në Podujevë dhe disa fshatra përreth. Nga ky projekt do të përfitojnë rreth 27,500 banorë të qytetit dhe fshatrave si Llapashticë, Katunishtë, Gllamnik, Dumosh, Sfeçël, Livadicë, Ballovc, Lladovc e Surkish. Investimi përfshin ndërtimin dhe zgjatjen e linjave të ujësjellësit, përmirësimin e presionit në rrjet, si dhe zvogëlimin e humbjeve teknike për të rritur cilësinë e furnizimit me ujë. Ministrja në detyrë e Ekonomisë, Artane Rizvanolli, ka theksuar rëndësinë e këtij projekti për një furnizim më të rregullt dhe cilësor të ujit për banorët e zonës.