Ministria e Infrastrukturës dhe Transportit po vazhdon punimet në aksin rrugor Livadhet e Istogut – Mokna, në kuadër të një projekti të financuar tërësisht nga kjo ministri dhe të realizuar në bashkëpunim me Komunën e Istogut. Aktualisht është në zhvillim faza e dytë e projektit, që përfshin asfaltimin e 11.9 kilometrave rrugë me një vlerë kontrate prej mbi 2.8 milionë euro. Së bashku me fazën e parë, që tashmë është përfunduar, investimi total ka arritur në mbi 3.6 milionë euro, duke mundësuar asfaltimin e gjithsej 19.1 kilometrave rrugë. Ky investim pritet të përmirësojë ndjeshëm qarkullimin, të lehtësojë qasjen në zonat me potencial të madh turistik të Istogut dhe të krijojë kushte më të mira për qytetarët dhe vizitorët, ndërsa Ministria premton vazhdimin e investimeve për modernizimin e infrastrukturës rrugore në të gjitha komunat e Kosovës.