Ministria e Ekonomisë ka ndarë 300 mijë euro për dy projekte që synojnë përmirësimin e furnizimit me ujë të pijshëm në disa fshatra të Komunës së Gjakovës dhe për projektin “Gjakova III”. Investimi do të përfshijë zgjerimin dhe rehabilitimin e infrastrukturës së ujësjellësit në zonat me nevojë më të madhe, duke përfshirë fshatrat Lugbunar, Osek-Hylë, Skivjan, Dol, Lipovec dhe Gërçinë. Kryeshefi Ekzekutiv i K.R.U. “Gjakova”, Hasan Krasniqi, ka mirëpritur këtë mbështetje financiare dhe ka theksuar rëndësinë e investimeve për përmirësimin e shërbimeve dhe cilësisë së jetës së banorëve. Ky projekt pritet të sigurojë furnizim më të qëndrueshëm me ujë të pijshëm, të ulë humbjet në rrjet dhe të ofrojë shërbime më cilësore për qytetarët.