Investimet e huaja direkte në Ballkanin Perëndimor po kërkojnë më shumë kapital për çdo vend pune të krijuar, duke treguar një zhvendosje drejt projekteve më të mëdha dhe më pak intensive në punësim. Sipas Bankës Botërore, gjatë periudhës 2021–2025, shuma e investuar për një vend pune është rritur ndjeshëm në shumicën e vendeve, veçanërisht në Shqipëri dhe Serbi, ndërsa Kosova ka shënuar një ngadalësim në këtë tregues. Kjo tendencë lidhet me investime në sektorë si energjia dhe pasuritë e paluajtshme, ku kapitali rritet, por krijimi i vendeve të punës mbetet i kufizuar. Megjithatë, rritja e shpenzimeve kapitale mund të ketë efekte pozitive në teknologji dhe produktivitet, por raporti nuk tregon për një rritje të cilësisë apo numrit të vendeve të punës në rajon.