Në hapësirat e Korporatës Energjetike të Kosovës do të ndërtohet për herë të parë një park solar me kapacitet minimal prej 100 MW, një investim prej 103 milionë eurosh që synon të sjellë energji të pastër dhe të përmirësojë furnizimin me energji elektrike. Projekti, i financuar nga Banka Evropiane për Investime, Banka Gjermane për Zhvillim dhe Bashkimi Evropian, është në fazën e marrjes së lejeve dhe pritet të nisë ndërtimi vitin e ardhshëm, me fillimin e gjenerimit të energjisë në vitin 2028. Ky park solar do të prodhojë rreth 152 GWh energji në vit, duke ulur ndjeshëm emetimet e karbonit dhe duke zvogëluar varësinë nga termocentralet, që do të sjellë ajër më të pastër dhe tarifa më të ulëta për qytetarët. Deputetët dhe ekspertët ekonomik vlerësojnë këtë projekt si një hap të rëndësishëm drejt energjisë së gjelbër dhe sigurisë së furnizimit, duke theksuar nevojën për investime të tilla kapitale për të modernizuar sistemin energjetik dhe për të mbajtur çmimet e energjisë në nivele të qëndrueshme.