Një projekt gjigant turistik me vlerë rreth katër miliardë dollarë po zhvillohet në zonën e Zvërnecit dhe ishullit të Sazanit, me investitorë kryesorë nga Katari. Kompania “Albania Land Development”, përgjegjëse për këtë investim, zotërohet në mënyrë të barabartë nga dy shtetas kataras, Mohamad Moataz Mhd Ruslan Alkhayat dhe Ramez Mhd Ruslan Alkhayyat, të cilët kontrollojnë pronësinë përmes disa kompanive të regjistruara në Katar. Një nga grupet më të mëdha private të biznesit në Katar, Power International Holding, është pjesë e strukturës së pronësisë, duke sjellë eksperiencë në sektorë si ndërtimi, turizmi dhe energjia. Autoritetet shqiptare synojnë që projekti të shndërrojë këtë zonë në një destinacion luksoz turistik me resorte, marina dhe hotele moderne, duke e bërë atë një nga investimet më të mëdha turistike në historinë e vendit.