Ish-kryeministri Isa Mustafa ka promovuar librin e tij të ri me titull “Konvergjenca ekonomike e Kosovës me Bashkimin Evropian”, ku trajton sfidat dhe perspektivat e zhvillimit ekonomik të Kosovës në raport me standardet evropiane. Ai thekson se motivi i tij për këtë libër nuk ka qenë vetëm akademik, por edhe një ndjenjë përgjegjësie për të analizuar rrugën e zhvillimit ekonomik të vendit dhe masat që duhet të ndërmerren për të dalë nga sindroma e të qenit i fundit në zhvillim. Në promovim, kryetarja e Akademisë së Shkencave dhe Arteve të Kosovës, Justina Shiroka-Pula, vlerësoi qasjen shkencore dhe metodologjike të librit, duke theksuar rëndësinë e tij për zhvillimin ekonomik dhe përpjekjet e Ballkanit Perëndimor për integrim në BE. Akademiku Besnik Krasniqi e cilësoi librin si një kontribut të rëndësishëm në debatin shkencor mbi zhvillimin ekonomik dhe integrimin evropian të Kosovës, duke analizuar faktorët ekonomikë, institucionalë dhe politikë që ndikojnë në procesin kompleks të konvergjencës ekonomike.