Në Qendrën Klinike Universitare të Kosovës janë konfirmuar dy shtatzëni të para pas procedurave të Fertilizimit të Asistuar Mjekësor (IVF), duke shënuar një hap të rëndësishëm në trajtimin e infertilitetit në vend. Drejtori i Gjinekologjisë, Zef Ndrejaj, ka theksuar se procesi ka nisur rreth një vit e gjysmë më parë dhe ka kaluar sfida si mungesa e preparateve hormonale, të cilat tashmë janë tejkaluar. Ai ka treguar se shumë raste të rënda që nuk kanë pasur sukses në klinikat private po trajtohen në QKUK, ku dy tentimet e para janë falas për pacientët. Megjithatë, Ndrejaj ka paralajmëruar se për shkak të interesimit të madh dhe nevojës për kohë deri në rezultat, disa pacientë mund të duhet të presin për trajtim, ndërsa tentimet e mëtejshme do të kenë një kosto simbolike.