Operatorit të shpërndarjes së energjisë elektrike, KEDS, i janë shqiptuar 13 gjoba administrative me vlerë totale prej 65 mijë eurosh për përdorimin e njehsorëve elektrikë me afat të skaduar të verifikimit metrologjik. Ministria e Industrisë, Ndërmarrësisë, Tregtisë dhe Inovacionit, përmes Agjencisë së Metrologjisë së Kosovës dhe Inspektoratit Qendror të Mbikëqyrjes së Tregut, ka zbuluar këto shkelje gjatë kontrolleve të fundit në të gjithë territorin e Kosovës. Janë identifikuar 13 njehsorë që funksiononin pa verifikim të vlefshëm, duke rrezikuar matjen e saktë të konsumit të energjisë dhe të drejtat e konsumatorëve. Kontrolli dhe mbikëqyrja do të vazhdojnë, ndërsa qytetarët janë ftuar të raportojnë çdo dyshim apo problem në lidhje me funksionimin e njehsorëve elektrikë përmes kanaleve zyrtare të ministrisë.