Korporata Energjetike e Kosovës (KEK) dhe Komuna e Fushë Kosovës kanë nënshkruar një memorandum bashkëpunimi që synon realizimin e projekteve kapitale në këtë komunë, si formë përgjegjësie sociale për dëmet e shkaktuara nga veprimtaria energjetike. Kryetari i Komunës së Fushë Kosovës, Valon Prebreza, theksoi se ky bashkëpunim do të sjellë përfitime materiale për qytetarët dhe se marrëveshja ishte dashur të nënshkruhej më herët, por mungesa e vullnetit e kishte penguar këtë. Ndërsa, kryeshefi ekzekutiv i KEK-ut, Gramos Hashani, vuri në dukje se bashkëpunimi është realizuar tani pasi janë plotësuar kushtet dhe se KEK-u do të ofrojë përkrahje direkte për komunitetin, ndërsa komuna do të ndihmojë me koordinim dhe lehtësime administrative. Ky memorandum shënon një kapitull të ri bashkëpunimi institucional mes KEK-ut dhe Komunës së Fushë Kosovës, me qëllim përmirësimin e kushteve për banorët e zonës.