Korporata Energjetike e Kosovës (KEK) ka nënshkruar një kontratë për realizimin e projektit “Trajtimi i ujërave shkarkuese nga Termocentrali Kosova B”, me vlerë rreth 12 milionë euro. Projekti parashikon ndërtimin e pesë impianteve të avancuara për trajtimin e ujërave industriale, të kontaminuara me vajra, atmosferike dhe sanitare, duke synuar reduktim mbi 90% të ndotësve kryesorë dhe eliminim pothuajse të plotë të vajrave dhe hidrokarbureve. Investimi do të përputhet me standardet e Bashkimit Evropian dhe do të përmirësojë cilësinë e ujit në lumin Sitnica, duke trajtuar për herë të parë në mënyrë të kontrolluar dhe standardizuar të gjitha ujërat shkarkuese nga “Kosova B”. Ky projekt është pjesë e planit më të gjerë të KEK-ut për modernizim dhe transformim, me investime mbi 500 milionë euro gjatë periudhës 2025–2027, të fokusuar në teknologjitë mjedisore dhe burimet e ripërtëritshme të energjisë.