Korporata Energjetike e Kosovës (KEK) ka filluar një remont të rregullt vjetor 30-ditor në njësinë B2 të Termocentralit Kosova B, si pjesë e planifikimit operativ për mirëmbajtjen teknike dhe sigurimin e funksionimit të qëndrueshëm. Ky proces synon rritjen e sigurisë në operim dhe zgjatjen e jetës së njësisë. Ndërkohë, njësia B1 po i nënshtrohet një projekti të madh modernizimi që përfshin instalimin e elektrofiltrave dhe sistemit DeNOx, me punimet që kanë nisur në prill dhe pritet të përfundojnë në dhjetor. Pas përfundimit të këtyre investimeve, KEK-u pret një rritje të ndjeshme të sigurisë së operimit, zgjatje të jetës së njësisë për rreth 20 vite dhe përputhje me standardet mjedisore të Bashkimit Evropian.