Korporata Energjetike e Kosovës (KEK) ka njoftuar rikthimin në operim të njësisë A4 pas përfundimit me sukses të ndërhyrjeve dhe sanimeve teknike. Procesi i startimit ka nisur dhe pritet që njësia së shpejti të sinkronizohet me rrjetin elektroenergjetik, duke siguruar furnizim më të qëndrueshëm me energji. Gjatë fazës së startimit, për shkak të procesit teknologjik, në komunën e Obiliqit mund të vërehet tym më i theksuar për disa orë, ndaj KEK-u ka kërkuar mirëkuptimin e qytetarëve. Njësia A4 ishte ndalur më 11 gusht për shkak të problemeve teknike, ndërsa tani rikthimi synon të sigurojë funksionim të qëndrueshëm dhe të sigurt.