Zyrës Kombëtare të Auditimit i ka dalë në pah se Korporata Energjetike e Kosovës (KEK) ka lidhur gjashtë kontrata për furnizim me acid klorhidrik dhe mazut në vlerë mbi 1.6 milionë euro përmes procedurës së negociuar, pavarësisht se kishte shpallur tenderë të rregullt. Raporti evidenton se KEK-u ka përdorur kritere diskriminuese në dosjet e tenderëve, duke shkelur Ligjin e Prokurimit Publik, dhe ka ndarë kontrata me vlerë minimale për të anashkaluar kufijtë financiarë. Gjithashtu, mungojnë dëshmi të pranimit të furnizimeve sipas standardeve ISO dhe menaxheri i kontratave nuk ka qenë i përfshirë në procesin e pranimit, duke rritur dyshimet për menaxhim të dobët dhe mungesë transparence. KEK-u ka justifikuar veprimet me nevojën për sigurimin e lëndëve bazë për prodhimin e energjisë, duke paralajmëruar se mungesa e tyre mund të shkaktojë krizë energjetike në vend, ndërsa ZKA ka vënë në dukje edhe mangësi në regjistrin e pasurive dhe në proceset e inventarizimit.