Zyra Kombëtare e Auditimit (ZKA) ka kërkuar një shtesë prej mbi 654 mijë eurosh në buxhetin për vitin 2026, për të mbuluar nevojat për 10 punëtorë të rinj, mallra, shërbime, shpenzime komunale dhe investime kapitale, përfshirë blerjen e një kombibusi dhe pajisje teknologjike. Kjo kërkesë u prezantua në Komisionin për Mbikëqyrjen e Financave Publike nga kryetari Arben Mustafa, i cili theksoi se buxheti aktual nuk mjafton për nevojat e reja të ZKA-së. Anëtarët e Lëvizjes Vetëvendosje argumentuan se kërkesa mund të përfshihet në rishikimin e buxhetit që pritet të nisë muajin tjetër dhe për këtë arsye nuk duhet të ndryshohet buxheti në këtë fazë. Ndërkaq, deputetët e opozitës nga PDK dhe LDK mbështetën kërkesën, duke paralajmëruar se refuzimi mund të ndikojë negativisht në performancën e ZKA-së dhe në raportet e auditimit për organizatat buxhetore, përfshirë Komunën e Prishtinës. Megjithatë, me 3 vota për, 5 kundër dhe 1 abstenim, kërkesa e ZKA-së nuk u miratua nga komisioni.