Komuna e Mitrovicës ka hapur thirrjen për aplikim në kuadër të Skemës së Granteve "E Ardhmja e Saj", e cila synon të mbështesë gratë dhe vajzat nga 18 deri në 35 vjeç që dëshirojnë të nisin bizneset e tyre. Përfitueset do të kenë mundësinë të përfitojnë trajnim, mentorim, konsulencë profesionale dhe një pako mbështetëse financiare deri në 4,000 euro. Projekti zbatohet nga organizata joqeveritare PREDA Plus në bashkëpunim me Komunën e Mitrovicës, me qëllim fuqizimin e ndërmarrësisë femërore dhe krijimin e mundësive të reja zhvillimore. Autoritetet komunale kanë ftuar të gjitha gratë dhe vajzat e interesuara të ndjekin njoftimet zyrtare për kriteret, afatet dhe procedurat e aplikimit.