Kryetari i Komunës së Vitisë, Sokol Haliti, ka kërkuar nga institucionet qendrore ndërhyrje urgjente për kompensimin e dëmeve të shkaktuara nga stuhia që goditi këtë komunë. Dëmet kanë prekur rëndë bujqësinë dhe ekonomitë familjare, duke tejkaluar kapacitetet financiare të komunës. Për të vlerësuar dëmet në mënyrë të drejtë dhe transparente, Haliti ka formuar një Komision Komunal që po punon në terren për evidentimin e pasojave. Ai gjithashtu ka bërë thirrje që qytetarët e dëmtuar të raportojnë dëmet për t’u përfshirë në procesin e kompensimit dhe premton se do të jetë zëri i tyre deri në realizimin e ndihmës nga niveli qendror.