Komunat e Kosovës po përballen me një krizë të thellë financiare, pas ekzekutimit të mbi 344 milionë eurove përmes vendimeve gjyqësore gjatë periudhës 2022–2026, shumica e të cilave lidhen me kontratën kolektive. Kryetari i Asociacionit të Komunave të Kosovës, Sazan Ibrahimi, paralajmëron se situata mund të rëndohet edhe më shumë me një barrë shtesë prej 15 deri në 20 milionë euro, për shkak të moszbatimit të vendimit të Gjykatës Kushtetuese për përllogaritjen e shtesës për përvojën e punës për periudhën 2023–2025. Kjo krizë po krijon presion të trefishtë financiar mbi komunat, duke ndikuar negativisht në buxhetet dhe investimet kapitale, si dhe duke rrezikuar funksionimin normal të pushtetit lokal dhe ofrimin e shërbimeve për qytetarët. ASK kërkon ndërhyrje urgjente nga Qeveria e Kosovës për të marrë përgjegjësinë financiare dhe për të zbatuar plotësisht vendimet kushtetuese, duke theksuar se komunat nuk kanë përgjegjësi për këtë situatë dhe nuk duhet të penalizohen për dështimet e nivelit qendror.