Në vitin 2025, komunat në Kosovë kanë shpenzuar mbi 126 milionë euro për të shlyer detyrimet ligjore dhe vendimet gjyqësore, në vend që këto fonde të përdoren për projekte zhvillimore si ndërtimi i rrugëve, çerdheve dhe përmirësimi i shërbimeve shëndetësore. Këto shpenzime burojnë kryesisht nga kontratat kolektive në arsim dhe shëndetësi, të cilat nuk janë nënshkruar nga komunat, por nga niveli qendror me sindikatat përkatëse. Kryetari i Asociacionit të Komunave, Sazan Ibrahimi, thekson se që nga viti 2022 deri tani, komunave u janë marrë mbi 350 milionë euro për këto detyrime, duke përfshirë pagesat për përmbarues, avokatë dhe procese gjyqësore. Në Komunën e Prishtinës, pagesat për vendime gjyqësore dhe përmbarimore janë rritur mbi 300% në vitin 2025, duke krijuar një bllokadë në buxhet dhe duke marrë paratë nga projektet kapitale, sipas kryetarit të Prishtinës, Përparim Rama. Pas kryeqytetit, komunat me rritjen më të madhe të këtyre pagesave janë Leposaviqi, Mamusha, Ferizaj dhe Prizreni.