Asociacioni i Komunave të Kosovës ka shprehur shqetësim të thellë për barrën financiare që po shkaktohet nga kontrata kolektive dhe vendimet gjyqësore që burojnë prej saj, duke theksuar se kjo situatë është e papërballueshme dhe po dëmton seriozisht stabilitetin financiar të pushtetit lokal. Mbi 26 komuna kanë nisur procedura gjyqësore, por deri më tani nuk është arritur një zgjidhje institucionale, ndërsa vetëm në periudhën 2022-2026 humbjet financiare kapin mbi 344 milionë euro, të cilat janë larguar nga investimet kapitale dhe shërbimet për qytetarët. Pavarësisht takimeve me krerë shtetërorë, përfshirë kryeministrin dhe ministrin e Financave, nuk është ofruar asnjë zgjidhje konkrete, ndërsa Gjykata Kushtetuese ka refuzuar trajtimin e çështjes. Përballë kësaj situate, Asociacioni ka paralajmëruar protesta nëse institucionet nuk ndërhyjnë urgjentisht për të ndalur dëmtimin e mëtejshëm të buxheteve komunale dhe për të krijuar mekanizma kompensues.