Drejtori ekzekutiv i Asociacionit të Komunave të Kosovës, Sazan Ibrahimi, ka kritikuar mungesën e mundësisë për rishikimin e buxhetit në komunat e vendit, duke theksuar se kjo po shkakton probleme serioze në realizimin e projekteve lokale. Ai ka theksuar se për shkak të vendimeve gjyqësore dhe mungesës së fleksibilitetit në menaxhimin e mjeteve, shumë projekte mbeten pa u zbatuar, ndërsa kryetarët kërkojnë që komunave t’u lejohet rishikimi i buxhetit gjatë këtij viti. Ibrahimi gjithashtu ka paralajmëruar humbje të mëdha nga të hyrat vetanake për shkak të mosfunksionalizimit të sistemit të ri të tatimit në pronë, që po ndikon negativisht në financat komunale. Ndërkohë, Qeveria e Kosovës ka miratuar buxhetin shtetëror për vitin 2026, ku përfshihen ndarjet për komunat, por kryeministri në detyrë Albin Kurti ka premtuar trajtim të vërejtjeve gjatë rishikimit të buxhetit.