Organizata Demokraci Plus (D+) ka kërkuar anulimin e një tenderi të Ministrisë së Kulturës dhe Turizmit në vlerë prej 743 mijë eurosh, që synon angazhimin e 26 personave përmes kontratave mbi vepër. Sipas D+, ky tender nuk përputhet me legjislacionin për prokurimin publik, pasi pozitat e parapara nuk janë shërbime të veçanta dhe përfshijnë detyra administrative, teknike dhe operative që duhet të plotësohen me procedura të tjera rekrutimi. Organizata thekson se Marrëveshjet për Shërbime të Veçanta duhet të përdoren vetëm për ekspertë me shërbime specifike që institucioni nuk mund t’i sigurojë me kapacitetet e veta. Për këto arsye, D+ kërkon anulimin e këtij tenderi, duke paralajmëruar se procedura aktuale është në kundërshtim me rregullat e prokurimit publik.