Ministri në detyrë i Infrastrukturës dhe Transportit, Dimal Basha, ka nënshkruar kontrata të reja për mirëmbajtjen e autoudhëve në Kosovë, me qëllim rritjen e efikasitetit, cilësisë dhe mbulueshmërisë së shërbimeve rrugore. Angazhimet për zbatimin e këtyre kontratave kanë nisur tashmë në terren, ndërsa institucionet kanë paralajmëruar mbikëqyrje të vazhdueshme për realizimin e obligimeve kontraktuale sipas standardeve të kërkuara. Kjo nismë vjen pas ankesave të qytetarëve për shembje të dheut dhe bllokim të korsive në autostradën “Ibrahim Rugova”, veçanërisht në hyrje dhe dalje të Suharekës, ku situata ka shkaktuar kolona dhe rrezik në trafik. Ministria ka theksuar se përveç kontratave të reja, do të ndërhyhet edhe për largimin e dheut dhe mbeturinave në segmente të ndryshme, ndërkohë që procedurat për trajtimin e skarpateve janë në shqyrtim në Organin Shqyrtues të Prokurimit.