Ministri në detyrë i Bujqësisë, Armend Muja, së bashku me Agjencinë e Ushqimit dhe Veterinarisë, zhvilluan një vizitë në pikat kufitare të Merdarës dhe Hanit të Elezit për të monitoruar zbatimin e kontrolleve fitosanitare dhe veterinare. Gjatë vizitës u theksua rëndësia e masave të reja, përfshirë vendosjen e akcizës për qumështin pluhur dhe produktet me vaj palme, si dhe forcimin e kontrolleve për produktet e qumështit dhe kafshët që importohen në Kosovë. Të gjitha produktet ushqimore dhe kafshët i nënshtrohen analizave laboratorike për të garantuar cilësinë dhe sigurinë ushqimore, duke mbrojtur tregun vendor dhe prodhuesit lokalë. Ministri Muja nënvizoi se këto masa janë të domosdoshme për mbrojtjen e konsumatorit dhe ekonomive familjare, ndërsa kontrollet do të vazhdojnë në të gjitha pikat hyrëse për të siguruar respektimin e standardeve.