Administrata Tatimore e Kosovës ka intensifikuar kontrollet ndaj bizneseve dhe individëve që ofrojnë shërbime gjatë sezonit të dasmave, një periudhë me qarkullim të lartë financiar. Në fokus të inspektimeve janë sallat e dasmave, këngëtarët, DJ-të, fotografët, makeup artistët, organizatorët e eventeve, si dhe bizneset që ofrojnë veshje ceremoniale dhe shërbime të tjera për ahengje familjare. ATK u ka bërë thirrje qytetarëve të raportojnë rastet e dyshuara të shmangies së detyrimeve tatimore përmes platformës elektronike ose Qendrës së Thirrjeve. Sipas të dhënave zyrtare, vetëm gjatë periudhës janar-gusht 2024, nga artistët janë mbledhur 2.3 milionë euro tatime, duke treguar një rritje të deklarimit dhe pagesës së tatimeve në këtë sektor.