Inspektorati Shtetëror i Tregut ka nisur kontrolle në të gjitha zinxhirët e marketeve në Maqedoninë e Veriut, të cilat do të zgjasin deri më 20 maj. Qëllimi është të monitorohet nëse ka rritje të marzhave dhe fryrje të çmimeve, ndërsa në rast të shkeljeve do të merren masa përkatëse. Ministri i Ekonomisë Besar Durmishi njoftoi se gjatë katër ditëve të para të kontrolleve është vërejtur një ulje e çmimeve të frutave dhe perimeve, megjithëse muajin e kaluar pati rritje të çmimeve ushqimore dhe ulje të marzhës nga tregtarët. Ai theksoi se inflacioni prej 5.7% lidhet me krizën globale, ndërsa qeveria po ndërmerr masa për stabilizimin e çmimeve, përfshirë edhe bashkëfinancimin e zejtarëve dhe ndërmarrjeve të vogla e të mesme për rritjen e produktivitetit dhe prodhimit.