Administrata Tatimore e Kosovës ka intensifikuar kontrollet në sektorët e shërbimeve estetike, kozmetike, dermatologjike dhe stomatologjike, duke përfshirë klinikat e ndërhyrjeve estetike, sallonet e bukurisë dhe qendrat e trajtimeve me laser. Qëllimi i këtyre veprimeve është rritja e përmbushjes vullnetare të detyrimeve tatimore, formalizimi i aktiviteteve ekonomike dhe krijimi i një konkurrence të drejtë mes bizneseve. ATK fton qytetarët që kanë përdorur këto shërbime të bashkëpunojnë duke raportuar rastet e moslëshimit të kuponëve fiskalë ose parregullsive të tjera përmes platformës online DENONCO ose Qendrës së Thirrjeve. Kjo nismë synon të sigurojë transparencë dhe rregullsi në një sektor që po zgjerohet dhe që ka ndikim të drejtpërdrejtë në shëndetin dhe mirëqenien e qytetarëve.