Qeveria ka vendosur uljen e detyrueshme të çmimeve të mjeteve shkollore, duke kërkuar që tregtarët me shumicë të zbresin çmimet për të paktën 10%, ndërsa ata me pakicë për të paktën 15%. Inspektorati Shtetëror i Tregut (ISHT) ka nisur kontrolle në terren për të siguruar respektimin e kësaj mase dhe për të verifikuar që çmimet e ulura të jenë të shënuara qartë në dyqane. Gjobat për mosrespektim variojnë nga 500 deri në 10,000 euro, ndërsa në rast të shkeljeve të rënda parashikohet ndalim i përkohshëm i veprimtarisë për 15 ditë. Masa hyri në fuqi më 25 gusht dhe do të zbatohet deri më 30 shtator, ndërsa qytetarët ftohen të raportojnë çdo parregullsi në numrin 191 ose në faqen zyrtare të ISHT-së.