Ministria e Financave e Kosovës ka nisur një proces të gjerë verifikimi për të kontrolluar përfituesit e shtesave për fëmijë, pas rritjes së shumës në tridhjetë euro dhe largimit të mbi 37 mijë qytetarëve brenda një viti. Dyshimet janë se shumë fëmijë që jetojnë në mërgim vazhdojnë të marrin këto përfitime nga buxheti i shtetit, duke krijuar hapësira për keqpërdorime. Aktualisht, rreth 406 mijë fëmijë marrin shtesa, por mungesa e kritereve të qarta dhe mosndërlidhja e sistemeve elektronike mes institucioneve po lejon përfitime të padrejta. Ministria po përdor platformën e-Kosova dhe po krahason të dhënat me institucionet e tjera, ndërsa paralajmëron një bazë të re ligjore që do të rregullojë këtë sektor dhe do të vendosë kriteret e qarta për përfituesit.