Ministrja në detyrë e Industrisë, Ndërmarrësisë dhe Tregtisë, Mimoza Kusari-Lila, priti një delegacion nga Bangladeshi për të diskutuar thellimin e marrëdhënieve ekonomike ndërmjet dy vendeve. Fokus u vu në bashkëpunimin në sektorë me potencial të lartë si industria farmaceutike, bioteknologjia dhe teknologjia informative, si dhe në krijimin e mundësive për bashkëpunim biznes me biznes. U diskutua gjithashtu për mundësinë që kompanitë bangladeshe të hapin linja prodhuese në Kosovë, duke e shfrytëzuar vendin si bazë për zgjerim në tregjet evropiane. Në takim u përmend edhe nisja e procesit për një marrëveshje dypalëshe të tregtisë së lirë, e cila pritet të rrisë shkëmbimet tregtare dhe investimet mes dy vendeve.