Ministrja në detyrë e Ekonomisë së Kosovës, Artane Rizvanolli, ka drejtuar një tryezë të rrumbullakët me ministrin francez Benjamin Haddad, ku u diskutuan prioritetet zhvillimore dhe bashkëpunimi ekonomik mes dy vendeve. Në këtë takim u nënshkruan pesë marrëveshje të reja, duke përfshirë ato për ekstradim, ndihmë juridike, kredi për investime infrastrukturore në kuadër të Lojërave Mesdhetare “Prishtina 2030” dhe zgjerimin e mësimdhënies së gjuhës frënge në Kosovë. Rizvanolli theksoi fokusin në tranzicionin energjetik, zhvillimin e energjive të ripërtëritshme dhe ftoi kompanitë franceze të investojnë në sektorë si teknologjia, prodhimi dhe infrastruktura. Ministri Haddad e cilësoi këtë bashkëpunim si fillimin e një faze të re dhe më ambicioze, duke vënë në dukje rëndësinë e Lojërave Mesdhetare për thellimin e marrëdhënieve ndërmjet dy vendeve.