Kosova dhe Gjermania kanë nënshkruar një marrëveshje granti për të thelluar bashkëpunimin në sektorin e energjisë së ripërtëritshme, në kuadër të projektit “Mbështetje për Partneritetin për Tranzicionin Klimatik dhe Energjetik” që zbatohet nga GIZ Kosova. Marrëveshja synon të lidhë investitorët gjermanë me institucionet dhe bizneset kosovare, duke krijuar partneritete afatgjata dhe duke lehtësuar shkëmbimin e informacionit dhe zhvillimin e projekteve konkrete në fushën e energjisë së pastër. Në kuadër të bashkëpunimit do të organizohen forume investimesh, tryeza të rrumbullakëta dhe ngjarje rrjetëzimi për të promovuar investimet dhe për të ofruar qasje në informacione rregullatore, teknike dhe financiare. Ky hap përfaqëson një përpjekje të përbashkët për të avancuar tranzicionin energjetik të Kosovës drejt një sistemi më të qëndrueshëm dhe më të pastër, me mbështetje nga Ministria Federale Gjermane për Mjedis dhe GIZ Kosova.