Në Ditën Botërore të Akreditimit, Ministria e Industrisë, Ndërmarrësisë, Tregtisë dhe Inovacionit (MINTI) theksoi rëndësinë e akreditimit si shtyllë kryesore të infrastrukturës së cilësisë, që garanton besueshmëri dhe siguri për produktet dhe shërbimet në Kosovë. Ministrja në detyrë, Mimoza Kusari-Lila, njoftoi se po punohet intensivisht për përafrimin e legjislacionit dhe praktikave me standardet evropiane, duke përfshirë ristrukturimin organizativ të ministrisë dhe agjencive për të rritur efikasitetin dhe transparencën. Përfaqësuesi i Bashkimit Evropian, Boguslaw Gertruda, vuri në dukje se Plani i Rritjes i BE-së ofron mundësi të rëndësishme për integrimin ekonomik të Kosovës në tregjet evropiane, ku akreditimi dhe vlerësimi i konformitetit luajnë rol kyç për bizneset eksportuese. Nëpërmjet një video-mesazhi, drejtuesja e organit belg të akreditimit BELAC, Maureen Logghe, falënderoi punën e Drejtorisë së Akreditimit të Kosovës, duke theksuar sfidat teknologjike dhe nevojën për angazhim të vazhdueshëm për të siguruar besueshmëri dhe paanshmëri në vlerësime.