Republika e Kosovës po merr pjesë për herë të parë si shtet partner në forumin ndërkombëtar të biznesit “Future Industry Minds” në Bensberg të Gjermanisë, duke prezantuar potencialin e saj ekonomik dhe mundësitë për bashkëpunim me industrinë gjermane. Në këtë forum marrin pjesë rreth 12 kompani kosovare nga sektorë të ndryshëm, përfshirë teknologjinë, ndërtimin, shërbimet dhe prodhimin, të cilat zhvillojnë takime direkte me përfaqësues të bizneseve gjermane për të krijuar partneritete të reja. Kryeministri në detyrë, Albin Kurti, ka hapur këtë ngjarje, ndërsa ministrja Mimoza Kusari-Lila thekson rëndësinë e këtij angazhimi për promovimin e kapaciteteve të vendit dhe për të dëshmuar se Kosova është një partner ekonomik i besueshëm. Gjatë forumit, ministrja do të marrë pjesë në panelin e diskutimit mbi zhvillimin e industrisë, ku do të bashkëbisedojë me përfaqësues të kompanive të mëdha si Siemens AG dhe Flaconi GmbH, duke theksuar potencialin për rezultate konkrete në ekonominë kosovare.