Shtetet e Bashkuara kanë vendosur një paketë të re tarifash prej 10 për qind që hyri në fuqi më 24 shkurt, duke goditur rëndë eksportuesit e vendeve në zhvillim, përfshirë Kosovën. Sipas një raporti të Bankës Evropiane për Rindërtim dhe Zhvillim (EBRD), Kosova renditet ndër vendet më të prekura në rajon, me rritje tarifash që variojnë nga +3.7 deri në +4.8 pikë përqindjeje, duke rritur kostot dhe konkurrencën në tregun amerikan. Ndërkohë, Shqipëria është më pak e prekur, me një rritje mesatare prej 2 pikë përqindjeje dhe mbetet ndër vendet me tarifa më të ulëta. Vendimi i SHBA-së vjen pas një vendimi të Gjykatës Supreme që rrëzoi tarifat globale të mëparshme të Trumpit, por presidenti amerikan ka vendosur tarifën e re në bazë të nenit 122 të Aktit të Tregtisë, duke kërcënuar edhe me rritje të mëtejshme për të ulur deficitin tregtar amerikan.