Kosova po merr pjesë në panairin ndërkombëtar “Foire de Paris 2026”, i cili po zhvillohet nga 30 prilli deri më 11 maj në Paris, Francë. Pjesëmarrja është organizuar nga Ministria e Industrisë, Ndërmarrësisë, Tregtisë dhe Inovacionit përmes Agjencisë për Investime dhe Përkrahjen e Ndërmarrjeve në Kosovë (KIESA). Në këtë panair, Kosova prezantohet me një hapësirë ekspozuese ku promovon sektorë kyç si turizmi, gastronomia, industria ushqimore dhe pijet, si dhe investimet, eksportin, artizanatin dhe inovacionin. Qëllimi kryesor është forcimi i imazhit të Kosovës si destinacion turistik dhe promovimi i produkteve vendore me potencial të lartë për tregjet ndërkombëtare, duke krijuar kontakte të reja me kompani dhe investitorë globalë për zgjerimin e bashkëpunimit ekonomik dhe rritjen e eksporteve.