Kosova rrezikon të humbasë rreth 60 milionë euro nga Plani i Rritjes i Bashkimit Evropian nëse nuk arrin të zbatojë 13 hapat e parë reformues deri më 30 qershor. Ngërçi politik dhe mungesa e institucioneve funksionale kanë penguar miratimin e ligjeve të nevojshme, duke ngadalësuar procesin e reformave në fusha si sundimi i ligjit, qeverisja dhe zhvillimi ekonomik. Ekspertët paralajmërojnë se humbja e këtyre fondeve do të jetë një goditje e rëndë për ekonominë e vendit, ndërsa mosrealizimi i reformave të tjera deri në fund të vitit mund të sjellë humbje shtesë prej mbi 165 milionë eurosh. Bashkimi Evropian ka parashikuar mbi 880 milionë euro grante dhe kredi për Kosovën deri në vitin 2027, por këto mbështetje varen nga përmbushja e kushteve të reformave.