Në lansimin e Forumit të Biznesit Mbretëri e Bashkuar–Kosovë, ministrja në detyrë Mimoza Kusari-Lila theksoi se Kosova po bëhet një qendër e rëndësishme për investime dhe tregti, veçanërisht në sektorët e teknologjisë, prodhimit dhe energjisë së ripërtëritshme. Eksportet e mallrave drejt Mbretërisë së Bashkuar u rritën me 81% gjatë vitit 2025, ndërsa tregtia e shërbimeve vazhdon të ruajë një suficit, duke reflektuar besimin në rritje të bizneseve britanike ndaj mjedisit afarist kosovar. Investimet e huaja direkte arritën në 24 milionë euro në vitin 2025 dhe po vazhdojnë të rriten edhe në vitin 2026. Forumi synon të forcojë më tej bashkëpunimin ekonomik, të krijojë vende pune dhe të integrojë ndërmarrjet kosovare në zinxhirët ndërkombëtarë të vlerës, duke shpresuar në rezultate konkrete në takimin e madh të tetorit.