Pas miratimit të marrëveshjeve të nevojshme në Kuvend, Kosova ka fituar të drejtën për të marrë parafinancimin prej mbi 60 milion eurosh nga Plani Evropian i Rritjes. Kjo shumë përfaqëson 7 për qind të shumës totale prej rreth 880 milion eurosh që Kosova përfiton nga ky plan. Komisioni Evropian ka konfirmuar se fondet do të lirohen pasi ligjet të shpallen zyrtarisht dhe të plotësohen kushtet e përgjithshme, përfshirë stabilitetin makroekonomik, menaxhimin e financave publike, transparencën dhe respektimin e mekanizmave demokratikë. Përveç reformave të nevojshme, Kosova duhet të angazhohet në normalizimin e marrëdhënieve me Serbinë për të vazhduar marrjen e pagesave nga ky instrument financiar.