Qeveria e Kroacisë ka vendosur çmime maksimale për produktet e naftës duke filluar nga e marta, me qëllim të frenimit të rritjes së çmimeve në treg. Benzina do të shitet me çmim maksimal prej 1.50 euro për litër, ndërsa nafta me 1.55 euro për litër, masa që do të qëndrojë në fuqi për të paktën dy javë. Kryeministri Andrej Plenkoviq ka theksuar se pa këto masa, çmimet do të ishin rritur në 1.55 euro për benzinën dhe 1.72 euro për naftën. Kjo është një masë e re pas periudhës së mëparshme të rregullimit të çmimeve që Kroacia kishte vendosur pas pushtimit të Ukrainës nga Rusia, e cila ishte hequr në korrik të vitit të kaluar.