Kompania Rajonale e Ujësjellësit “Prishtina” ka njoftuar fillimin e procesit të nënshkrimit të kontratave me të gjithë konsumatorët e kyçur në rrjetin e ujësjellësit, duke filluar nga java e ardhshme. Këto kontrata përcaktojnë marrëdhëniet juridike ndërmjet palëve, duke përfshirë të drejtat dhe obligimet e konsumatorëve dhe kompanisë, mënyrën e faturimit, si dhe procedurat për ankesa dhe kërkesa. KRU “Prishtina” ka apeluar që qytetarët të mos hezitojnë të nënshkruajnë kontratat, pasi mos-nënshkrimi mund të shkaktojë pengesa në realizimin e të drejtave dhe obligimeve të tyre. Kompania ka paralajmëruar se do të japë një afat ligjor për nënshkrimin e kontratave, pas të cilit konsumatorët që nuk i nënshkruajnë do të shkyçen nga shërbimet e ujësjellësit.