Kompania Rajonale e Ujësjellësit “Prishtina” ka nisur një fushatë ndërgjegjësimi që nga 4 marsi për konsumatorët që nuk kanë nënshkruar kontratën për shërbime, duke theksuar se kjo është një obligim ligjor për të dyja palët. Aktualisht, nga 180 mijë konsumatorë, vetëm rreth 70 mijë e kanë nënshkruar kontratën, ndërsa pjesa tjetër ka afat 10 ditë nga dorëzimi i kontratës për ta nënshkruar, përndryshe rrezikon ndërprerjen e furnizimit me ujë. Zëdhënësja Arjeta Mjeku shpjegoi se kontrata përcakton qartë të drejtat dhe detyrimet e konsumatorit dhe kompanisë, si dhe kushtet e pagesës dhe ofrimit të shërbimit sipas rregullave të Autoritetit Rregullator për Shërbime të Ujit. Konsumatorët mund të nënshkruajnë kontratën në drejtorinë e ujësjellësit ose në çdo pikë arkëtimi të KRU “Prishtina”, madje edhe gjatë pagesës së faturës së ujit, ndërsa ata që refuzojnë duhet të japin arsye, përndryshe kompania do të ndërmarrë masa për shkyçje nga rrjeti.